தொல்தமிழர் வழிபாடுகளும் விழாக்களும் -56.
முனைவர் இரெ. குமரன்: 3.ஐங்குறுநூறு:
தொல்தமிழர் - வழிபாடு: குடித்தெய்வமாம் முருகனை வழிபடுதல்:
”குன்றக் குறவன் கடவுள் பேணி
இரந்தனன் பெற்ற எல்வளைக் குறுமகள்
ஆய் அரி நெடுங்கண் கலிழ
சேயதால் தெய்ய நீ பிரியும் நாடே.”
- கபிலர், குன்றக் குறவன் பத்து :257.
குன்றத்தின்கண் வாழும் குறவன் தன் குடித்தெய்வமாம் முருகனை வழிபட்டு, குறையிரந்து பெற்ற ஒள்ளிய வளைகளை அணிந்த இளமகள் இத்தலைவி ; ஐய...! நீ இவளுடைய அழகிய அரிபரந்த நெடிய கண்கள் கலங்கி நீர் உகுக்குமாறு பிரிந்து செல்ல விரும்பும் நாடு மிகச் சேய்மைக்கண் உள்ளது (நின் பிரிவை இவள் எங்ஙனம் ஆற்றியிருப்பாள் ..?)
(சில காலம் கழித்து வந்து மணந்துகொள்வதாக உறுதி கூறிப் பொருள் தேடச் செல்ல விருபுவதாகத் தோழியிடம் கூறி அதற்குத் தலைவியின் ஒப்புதல் பெற்றுத்தருமாறு வேண்டினான் ; தோழி அதற்கு உடன்படாது செல்லியது இது.)
(இரந்தனன் - தவமிருந்து வேண்டி ; எல்வளை - ஒளிவிடும் வளை ; ஆய் - அழகிய ; கலுழ - கலங்க ; சேயது - சேய்மைக்கண் உள்ளது.)
குறிப்பு :
சங்க இலக்கியத்தில் பெண் மகள் அளிக்குமாறு இறவனை வேண்டுவதாக அமைந்த செய்யுள் இஃது ஒன்றே, என்பார் ‘ பேராசிரியர் அ. தட்சிணாமூர்த்தி. .................................................தொடரும்.............................
