தன்னேரிலாத தமிழ்-29 செய்ந்நன்றி அறிதல்

தன்னேரிலாத தமிழ்-29

செய்ந்நன்றி அறிதல்

“செய்ந்நன்றி அறிதலும் சிற்றினம் இன்மையும்

இன்முகம் உடைமையும் இனியன் ஆதலும்

செறிந்து விளங்கு சிறப்பின் அறிந்தோர் ஏத்த.” – சிறுபாணாற்றுப்படை.

நல்லியக்கோடனின் புகழுக்கு, அவனின்  செய்ந்நன்றி மறவாமையும் சிற்றினம் சேராமையும் இரவலர்மாட்டு இன்முகமுடைமையும் எவரிடத்தும் இனியனாம் தன்மையும் ஆகிய அருங்குணங்களே காரணம் என்று புகழ்வர் சான்றோர்.

“ நன்றி சாம் நன்றி அறியாதார் முன்னர்ச் சென்ற

 விருந்தும் விருப்புஇலார் முன்சாம் -அரும்புணர்ப்பின்

பாடல்சாம் பண்ணறியாதார் முன்னர் ஊடல் சாம்

ஊடல் உணரார் அகத்து” – நான்மணிக்கடிகை.

பிறர் செய்யும் நன்மைகளை, நன்மையெனத் தெரிந்துகொள்ளாதவர்பால் செய்ந்நன்றி கெடும் ; அன்பில்லாதவர்களிடத்தில் வந்த விருந்தினரும் வருந்துவர் ; பண் இசையை அறியாதவர்களிடத்தில் அரிய இசையுடைய பாடல்கள் கெடும் ; ஊடல் இனிமையைத் தெரிதல் இல்லாத கணவரிடத்தில் ஊடுதல் கெடும்.

“ கன்றாமை வேண்டும் கடிய பிறர் செய்த

  நன்றியை நன்றாகக் கொளல் வேண்டும் ….” --- நான்மணிக்கடிகை.

 பிறர்செய்த தீமைகளை மறத்தல் வேண்டும் ; பிறர் செய்த நன்மைகளைப் பெரிதும் நினைத்தல் வேண்டும்.

 “ செய்த நன்று உள்ளுவர் சான்றோர் கயம்தன்னை

வைததை உள்ளி விடும் ” – நாலடியார்.

சான்றோர்கள் பிறர் செய்த நன்மையை மட்டுமே நினைத்துக்கொண்டிருப்பார்கள் ; கயவர்கள் பிறர் தம்மை வைததை மட்டுமே நினைத்துக் கொண்டிருப்பார்கள்.

“  நிலம்புடை பெயர்வ தாயினும் ஒருவன்

 செய்தி கொன்றோர்க்கு உய்தி இல்லென

அறம் பாடிற்றே ஆயிழை கணவ .” ---- புறநானூறு.

நிலம் தலகீழாகப் பெயர்வதாயினும் ( உலகம் அழியும் காலத்தே தீவினைகள் அழியும் ஆயினும் அக்காலத்தும் ) ஒருவன் செய்த நன்றியை மறந்தவர்க்கு அத்தீவினையிலிருந்து உய்வதற்கு வழியில்லை என்று அறநூல் கூறும்.