தன்னேரிலாத தமிழ் –441: குறள் கூறும் ”பொருள்” பெறுக

 

தன்னேரிலாத தமிழ் –441: குறள் கூறும் ”பொருள்” பெறுக

496

கடலோடா கால்வல் நெடுந்தேர் கடலோடும்

நாவாயும் ஓடா நிலத்து.

வலிய சக்கரங்களை உடைய நெடிய தேர் கடலில் ஓடாது ; கடலில் ஓடும் கப்பல் நிலத்தில் ஓடாது. இடனறிந்து இயங்குக.

 எந்த ஒன்றின் இருப்பும் இயக்கமும் அதனதன் இடத்திலேதான் பெருமைபெறும் ; இஃது இயற்கையின் நியதி. இடம் மாறினால் தடம் மாறும்.

“ வெட்டனவை மெத்தனவை வெல்லாவாம் வேழத்தில்

பட்டுருவும் கோல் பஞ்சில் பாயாது –நெட்டிருப்புப்

பாரைக்கு நெக்கு விடாப் பாறை பசு மரத்தின்

வேருக்கு நெக்கு விடும்.” –நல்வழி, 33.

யானையின் உடலை ஊடுருவிப் பாய்ந்த  கூர்மையான அம்பு, பஞ்சில் பாய்ந்து ஊடுருவாது ; இரும்பால் செய்த கடப்பாரைக்கு உடையாத  கடிய கருங்கல் பாறையைப் பசுமையான மரத்தின் வளர்கின்ற வேர் உடைக்கும். அதுபோல எக்காலத்திலும் கடுமையான சொற்கள் இனிமை உடைய சொற்களை வெற்றி கொள்ள இயலாது.