தொல்தமிழர் வழிபாடுகளும் விழாக்களும் -71.
முனைவர் இரெ. குமரன்: 6. கலித்தொகை:
தொல்தமிழர் - வழிபாடு : தெய்வத்துத் திறன் நோக்கி.... !
“செய்பொருட் சிறப்பு எண்ணிச் செல்வார் மாட்டு இனையன
தெய்வத்துத் திறன் நோக்கித் தெருமரல் - தேமொழி
வறன் ஓடின் வையகத்து வான்தரும் கற்பினாள்
நிறன் ஓடிப் பசப்பு ஊர்தல் உண்டு என
அறன் ஓடி விலங்கின்று அவர் ஆள்வினைத் திறத்தே.”
- பாலை பாடிய பெருங்கடுங்கோ, 16, 18 – 22.
தேமொழி , செய்வினையாற் பெறுகின்ற பொருளின் சிறப்பை எண்ணிச் சென்றவரிடத்து, தெய்வத்தின் அருளை வேண்டி மனம் சுழலுதல் வேண்டாம் ; வறட்சி மிகுந்து துயருற்ற காலத்தும் வையம் கெட்டதாகில் அவ்வையகத்திடத்தே மழையைப் பெய்விக்கும் கற்பினை உடையாளுடைய தன் அழகு கெட்டுப் பசலை பாய்ந்து விடுதலும் நிகழுமோ என்று அறக்கடவுள் தானே கருதி, அவர் முயற்சி இடத்தே விரைந்து சென்று விலக்கி நின்றது ; நீ கவலை அடையாதே என்றாள் தோழி.
( தெய்வத்தை வணங்காது, கணவனையே கடவுளாக எண்ணி வாழ்பவள் பெய் என்றால் மழை பொழியும் என்ற குறள் கருத்தின் சான்றாகத் திகழ்பவள் இத் தலைவி.)
( கற்பின் பெருமை இப்பாடலில் சிறந்து நிற்கின்றது ; காதலன் நலம் வேண்டி மழையையும் கனலியையும் காற்றையும் வழிபட விரும்பிய தலைவிக்கு அறக்கடவுளே உதவுவது குறிப்பிடத்தக்கது.)
.....................................தொடரும்...........................................
கருத்துகள் இல்லை:
கருத்துரையிடுக