திருக்குறள் -சிறப்புரை
:1097
செறாஅச் சிறுசொல்லும் செற்றார்போல் நோக்கும்
உறாஅர்போன்று உற்றார் குறிப்பு. ---- ௧0௯௭
மனத்தில் பகையின்றிக் கூறும் கடுஞ்சொல்லும் ; சினம் கொண்டவரைப்போன்று
பார்த்தலும்; புறத்தே அயலார் போலக் காட்டிக்கொள்வதும்
; அகத்தே காதல் கொண்டவரின் குறிப்பாம்.
“ உள்ளிக் காண்பென் போல்வன்
முள் எயிறு
அமிழ்தம் ஊறும் செவ்வாய்க்
கமழ் அகில்
ஆரம் நாறும் அறல்போல் கூந்தல்
பேரமர் மழைக்கண் கொடிச்சி
மூரல் முறுவலொடு மதைஇய நோக்கே.”
---குறுந்தொகை.
முள்ளைப்போன்ற கூரிய பற்களையும் அமிழ்தம் ஊறுகின்ற அழகிய செய்ய வாயையும் மணம் வீசுகின்ற அகிற்புகையும் சந்தனப்புகையும் மணக்கின்ற
கருமணலைப்போலக் கரிய கூந்தலையும் பெரிய அமர்த்த
கண்களையும் உடைய தலைவியின் புன்னகையோடு, செருக்கின
பார்வையை, நினைத்துப் பார்ப்பேன் போல்வன்.
கருத்துகள் இல்லை:
கருத்துரையிடுக